⚡️ ҚИЁМАТГА ҚОЛМАГАН ДИЙДОР
ҚИЁМАТГА ҚОЛМАГАН ДИЙДОР
Яқинда шунақа ҳолатнинг гувоҳи бўлдим. Ота-онаси вафот этган олти ака-ука қабулимга келиб, улар ота-онадан саккиз фарзанд эканликларини, энг катта опалари билан энг кичик сингиллари ўн йилдан бери гаплашмасликларини, бунга сабаб, опа-сингилнинг бир-бири билан қуда-анда бўлганлиги, яъни опанинг ўғли сингилнинг қизига уйланганлигини, лекин опанинг ўғлининг Россияда бошқа оиласи бўлиб, ўғил жиян буни яшириб, ўз холасининг қизига уйланганлигини, улар ўртасида икки нафар фарзанди туғилганлигини, ҳар сафар Россияга бориб келишини айтишди. Бобо ва буви вафот этганидан кейин, опанинг ўғли Россияда хотини ва болалари борлигини, энди Ўзбекистонга қайтиб келмаслигини айтиб, опа-сингилнинг ўн йилдан бери юзкўрмас бўлиб қолишига сабабчи бўлган экан.
Мен қабулимга келганларга мерос гувоҳномасини расмийлаштириш учун барча фарзандлар нотариусга келишини айтганимда, улар аразлашган опа ва сингиллар нотариал идорага келмаслигини айтишди.
Шундан сўнг мен Ўзбекистон Республикаси Фуқаролик кодексининг тегишли моддаларига асосан мерос ишини расмийлаштириш тартиби, меросхўрлар доирасини уларга тушунтириб, опа-сингилни ҳам нотариал идорасига келиши лозимлиги ҳақида чақирув хати ёзиб бердим.
Белгиланган кунда ҳамма фарзандлар биргаликда нотариал идорада ҳозир бўлишди, катта опани кабинетимга алоҳида таклиф қилиб, унинг ота-онаси вафотидан сўнг у оила сардори эканлигини, онадан сўнг у энг меҳрибон аёл сифатида, яъни она ўрнида барча опа-сингил ва ака-укаларни бирлаштириб, уларни аҳил бўлишларига масъул эканлигини, ўғли ва келин-жияни ўртасида бўлиб ўтган гина-кудратларни эндиликда эсдан чиқариб, силаий раҳм яъни қариндошлик ришталарини мустаҳкам боғлаб, ҳаммалари бирлашишлари лозимлигини тушунтириб, панду насиҳат қилдим.
Биргина кечирим, ришталарни қайта боғлаши мумкин, биргина ширин сўз синиқ кўнгилларни шод қилиши мумкинлиги ҳақида мисоллар келтириб, имкон қадар тушунтиришга ҳаракат қилдим. Шундан сўнг ҳаммаларини ичкарига таклиф этдим ва уларга ҳам “агар ота-онангиз тирик бўлганида бундай ҳолатга улар қандай қарарди, аслида ота-онадан қоладиган асл мерос - бу ака-ука ва опа-сингил” деб айтдим. Ҳаммалари бир-бирларига қараб қолишди ва менинг кўз ўнгимда мўъжиза юз берди, яъни опа-сингил бир вақтнинг ўзида бир-биридан кечирим сўрашди.
Ўн йиллик гина-кудратлар парчаланиб, опа-сингилнинг ярашиб кетганларига ўз ҳиссамни қўшганлигимдан жуда мамнун бўлдим. Шукроналар айтдим.
Ҳаёт жуда қисқа. Уни гина – кудурат, адоват, ҳасад, қариндош ва яқинлар билан алоқани узишга сарфлаб юбориш асло тўғри эмас. Ҳар бир иш, ҳар бир вақт эртага хотирага айланади. Шундай экан, таббасум билан юринг, ёмонлик қилганларни кечиринг, гина-кудратни унутинг, қачон бу дунёни тарк қилишимизни билмаймиз-ку...
Ҳаёт - инсонга берилган бир неъмат, бир кун ёруғ бўлса, бир куни зулмат, лекин олтинга тенгдир ҳар бир соат вақт, унутманг, азизлар, умр ғанимат.
Мафуза Сатторова,
Бухоро шаҳрида хусусий амалиёт билан шуғулланувчи нотариус