🌹“Атиргул” республика кўрик-танлови қайта тикланди

“Атиргул” республика кўрик-танлови қайта тикланмоқда.
Ўзбекистон Журналистлар уюшмаси Оила ва хотин-қизлар қўмитаси билан ҳамкорликда Мустақилликнинг 35 йиллиги муносабати билан “Атиргул – 2026” республика кўрик-танловини эълон қилди.

Танлов ОАВда фаолият юритаётган хотин-қизларни қўллаб-қувватлаш, уларнинг касбий ютуқларини эътироф этиш, хотин-қизларнинг ижтимоий-сиёсий фаоллигини ошириш, оила институтини мустаҳкамлаш ҳамда тазйиқ ва зўравонликнинг олдини олишга қаратилган.

Танлов 12 та номинация бўйича ўтказилади. Улар орасида энг яхши телевизион ва радио материал, босма ва интернет журналистикаси, ижтимоий тармоқ лойиҳаси, журналистик суриштирув, фотожурналистика, ҳужжатли фильм ёки махсус медиалойиҳа, энг яхши ёш журналист ҳамда ҳудудий журналистик материал йўналишлари бор.

Номзодлар Ўзбекистон Журналистлар уюшмасининг ҳудудий бўлимлари, уюшма ҳузуридаги ижодий кенгашлар ҳамда Оила ва хотин-қизлар қўмитаси томонидан тавсия этилади.
Тавсияномалар 20 июлдан 20 августгача қабул қилинади.
Ғолиблар Ўзбекистон Мустақиллигининг 35 йиллиги арафасида эълон қилиниб, махсус диплом, эсдалик статуэткаси ва пул мукофоти билан тақдирланади.

Маълумот учун, журналист аёллар ўртасидаги ушбу танловнинг тарихи 1998 йилга бориб тақалади. У анъанавий равишда 8 март — Халқаро хотин-қизлар куни арафасида ўтказиб келинган, бироқ 2011 йидда молиявий сабабларга кўра бир неча йил тўхтаб қолган. Танлов 2022 йилда қайта тикланиб, 2023 йилда ҳам ўтказилган. 2024–2025 йилларда ўтказилмади. Энди «Атиргул» 12 та номинациядан иборат янгиланган форматда яна эълон қилинди.